Алматыдағы қақтығыс кезінде ұсталғандардың бір бөлігі қазір ЛА-155/18 мекемесінде жатыр. Тергеу қапасына түскендердің саны 200-ге жуықтайды.
Мекеме өкілдерінің айтуынша, арасында ауыр дене жарақатымен түскендер де бар. Экспресс К тергеу қапасына барып, қамалғандардың туыстарымен тілдесіп қайтты.
Анаргүл Кенжебаева 10 күннен бері ЛА-155/18 мекемесінің алдын тоздыруға мәжбүр. Жалғыз үміті — баласын көру. Оның айтуынша, ұлын 10 қаңтарда полицейлер алып кеткен. Содан бері баласынан хабар жоқ.
«Баламның жатқанына 10 күннен асты. Баламды көрген де, дауысын естіген де жоқпын. Хабар жоқ. Балам 27 жаста. Коменданттық сағатты бұзғаны үшін Ұлжан ықшамауданынан алып кеткен. Қандай айып тағылды деп сұрасақ, бұзақылық бойынша, видео-фотоға түсіп қалған дейді. Бірінші күні ұлым достарымен алаңда болыпты. Ол күні елдің бәрі көшеге шықты емес пе?! Бұл қазақтың мысын басу ма, мен түсінбедім. Жастарымыз қамалып жатыр», — дейді Анаргүл Кенжебаева.
Қазір бұл қапаста 200-ге жуық адам отыр. Барлығына жаппай тәртіпсіздік ұйымдастыру, заңсыз қару сақтау және ұрлық баптарымен іс қозғалған. Бірақ қамалғандардың туыстары соттың бұл шешімімен келіспейді. Көбі адвокат жалдағанын айтып отыр.
ЛА-155/18 мекемесінің алдында азық-түліктерін арқалағандар ұзын-сонар кезекке тұрған. Арасында таңғы сағат 5-тен жүргендер де бар екен.
«Таңертең келдім. 200-ден аса адам тұр. Мен 172-ші болып кезекке тұрдым. Таңғы сағат 5-тен келгендер бар. 10 қаңтар күні баламды алып кетті. Осында бар екенін білеміз. Бірақ ол тірі ма, денсаулығы дұрыс па, ол жағы беймәлім. Өмірі үшін алаңдап отырмыз. Сенбі, жексенбі күндері сәлем-сауқатты қабылдамайды. Жұмыстан сұранып келіп жүрміз. Тым болмаса бір ата-ана кіріп ішін көріп шықсыншы деп өтініш те айттық. Бірақ нәтиже жоқ», — дейді ұлына келген тағы бір ата-ана.
Ата-аналардың бұл өтініші жақын уақытта орындалмайтын секілді. ЛА-155/18 мекемесі бастығының орынбасары Мұратжан Кәкімжанов әзірге карантинге байланысты кіруге рұқсат жоқ дейді.
«Алматы қазір қызыл аймақта тұр. Сондықтан кездесулерге тыйым салынған. Қамалған азаматтардың туыстарына түсіндірме жұмыстарын жүргізіп жатырмыз. Іштегі тәртіп, барлығы бірқалыпты. Ұрып-соғып жатыр деген әңгіме шындыққа жанаспайды», — деді Мұратжан Кәкімжанов.
Мұратжан Кәкімжановтың айтуынша, түрлі дене жарақатымен түскендердің барлығына медициналық көмек көрсетілген. Ал ауыр жағдайда жатқан 21 адам ауруханаға жіберіліпті.
