Кәдеге жарату алымдарын мемлекет меншігіндегі жаңа компания қаңтардың 24-інен қабылдап бастайды.
Бұл туралы утилизациялық алымға байланысты алғашқы отырыста айтылды, деп хабарлайды Экспресс К.
Бүгін «ӨКМ операторы» жұмысының тоқтатылуына және оның функцияларын мемлекеттік ұйым — «Жасыл даму» АҚ-ға беруге байланысты жұмыс тобының алғашқы отырысы өтті. Жиын барысында кәдеге жарату алымын басқару мәселесі қарастырылды. Әрі жаңа мемлекеттік компанияның мүмкіндігі айтылды.
Дүйсенбіден бастап, яғни биылғы жылдың 24-ші қаңтарынан «Жасыл даму» АҚ-ның кәдеге жарату төлемдерін қабылдау бойынша жұмыстары жанданады. Қазіргі уақытта компания екінші деңгейлі банктерде шоттар ашып, сондай-ақ төлем жүйелеріне өзгерістер енгізуде,
Сонымен қатар, отырыста «Жасыл даму» АҚ-ға «ӨКМ Операторы» ЖШС-нің кәдеге жарату төлемін жинау, автоөндірушілерді ынталандыру, ауыл шаруашылығы техникасына жеңілдік сертификаттарын (ваучерлер) беру, істен шыққан көліктерді тапсырғаны үшін өтемақы төлеу, қалдықтарды жинаушыларды, тасымалдаушыларды және кәдеге жаратушыларды субсидиялау сияқты барлық функциялары Экокодекске сай берілгені де айтылды.
Жиында ауыл шаруашылығы техникасына бұрын берілген жеңілдік сертификаттары (ваучерлер) жарамды және келесі аптадан бастап жаңа оператор бұрынғы «ӨКМ Операторының» сайты арқылы істен шыққан көліктерді жеткізуге өтініштерді қабылдай бастайтыны да хабарланды. Ескі көліктерді қабылдау пункттері де қайта ашылады. Кәдеге жарату алымының мөлшерлемелерін қайта қарауды Ведомствоаралық жұмыс тобы жүргізеді. Оның құрамына қоғам өкілдері де кіреді.
Еске салайық, бұған дейін Мемлекет басшысы утилизациялық алымдарға қатысты бірқатар тапсырмалар берген. Кейін кәдеге жарату алымдарын қандай компания жинайтыны белгілі болды.
