Облыстық ардагерлер кеңесі мен Байзақ ауданы әкімдігі бірігіп, 8 наурыз – Халықаралық әйелдер күніне орай, бір топ аналар қауымына құрмет көрсетті. Нақты айтқанда облысымыздың түкпір-түкпіріндегі ауданға, облысқа еңбегі сіңген және еңбек сіңіріп жүрген 45 ақжаулықты аналарға арналып «Ғибарат» орталығында ақ дастархан жайылды.
Әйелдер мерекесіне орай ұйымдастырылған басқосу барысында облыстық ардагерлер кеңесінің төрағасы Еркінбек Солтыбаев ақжарма тілегін арнады. Ол өз сөзінде кеудесінде «Алтын жұлдызы» жарқыраған Мәрзия Ибрагимова секілді өз еңбегінің арқасында биік белестерді бағындырған нәзік жанды «Еңбек ерлерінің» және солардың жолын қуған қоғамда сыйлы қыз-келіншектердің қатары аз емес екенін айта келе, оларға құрмет көрсету парыз әрі мәртебе екенін тілге тиек етті. Бұдан кейін айтыскер ақын, Байзақ ауданының Құрметті азаматы Қасқырбай Нарбатыровқа Байзақ ауданының өткені мен бүгінін, өскені мен дамуын, талай тұлғарды тудырған өңірлік сипатын әңгімеге арқау етті. Облыстық ардагерлер кеңесінің төралқа мүшесі, «Галеника» кәсіпорнының директоры Қатира Аққұлиева құттықтау сөз сөйлеп, бес бірдей анаға сый-сияпат жасады. Ал облыстық ардагерлер кеңесі жанынан құрылған «Билер кеңесінің» төрағасы Оңласын Есіркепов, Байзақ ауданының ардагерлер кеңесінің төрағасы Кемелбек Бесбаев жиынды қортындылады.
Байзақ аудандық мәдениет үйінің қызметкерлері тарапынан коцерттік бағдарлама ұсынылып, өз кезегінде өнер жолында шығармашылық шыңын бағындырған бірқатар әйел-аналар қауымы ән-жырдан шашу шашты.
Нұрым Болатұлы
