Тараз қаласындағы №1 бөбекжай-бақшасында сыбайлас жемқорлықтың алдын алу және адалдық мәдениетін қалыптастыруға бағытталған кездесу өтті.
Іс-шара Жамбыл облысы әкімдігінің ақпарат және қоғамдық даму басқармасы жүзеге асырып отырған «Қоғамда сыбайлас жемқорлыққа қарсы мәдениетті қалыптастыруға бағытталған іс-шараларды ұйымдастыру» мемлекеттік-әлеуметтік тапсырысы аясында және техникалық ерекшелік талаптарына сәйкес ұйымдастырылды.
Кездесудің мақсаты – мектепке дейінгі білім беру ұйымы қызметкерлерінің құқықтық сауаттылығын арттыру, адалдық қағидаттарын насихаттау және сыбайлас жемқорлықтың алдын алу.
Іс-шараға балабақша ұжымы қатысып, кәсіби қызметтегі ашықтық, әділдік және жауапкершілік мәселелерін талқылады. Жиынның спикері – «Әділдік жолы» РҚБ Жамбыл облыстық филиалының жетекшісі Назима Жұбандықова болды.
Спикер өз сөзінде сыбайлас жемқорлыққа қарсы мәдениетті қалыптастыру ерте жастан басталуы тиіс екенін атап өтіп, тәрбиешілердің балаларға адалдық, әділдік құндылықтарын дарытудағы рөліне ерекше тоқталды. Сонымен қатар, қызметтік әдеп нормаларын сақтау, ашықтық қағидаттарын ұстану және заң талаптарын орындау мәселелері түсіндірілді.
Кездесу барысында қатысушылар өзара пікір алмасып, сұрақтарына жауап алды. Ашық форматтағы диалог ұжымның тақырыпқа деген қызығушылығын арттырды.
Іс-шара қорытындысында адалдыққа негізделген тәрбие – болашақ қоғамның іргетасы екені атап өтілді. Аталған дәріс «Адал қоғам» ҚБ ұйымдастыруымен өтті.
