uinness World Records / Facebook
Қазіргі таңда әлемдегі ең қарт адам атағы британиялық Этель Катерхэмге тиесілі. Ол 21 тамызда 117 жасқа толды, деп хабарлайды turkystan.kz.
Мерейтой Суррей графтығындағы Лайтвотер қаласында орналасқан Hallmark Lakeview қарттар үйінде атап өтілді. Этель Катерхэм әлемдегі ең қарт адам атағын 2025 жылдың сәуірінде 116 жасында қайтыс болған бразилиялық монах Ина Канабарро Лукастан кейін иеленген.
Этель Катерхэм 1909 жылдың 21 тамызында, «Титаник» апатынан үш жыл бұрын дүниеге келген. Ол Хэмпшир графтығындағы Шиптон-Беллинджер ауылында сегіз балалы отбасының екінші перзенті болып туған. Балалық шағы Уилтшир графтығындағы Тидворт қаласында өткен.
1927 жылы жасөспірім шағында Этель Үндістанға барып, әскери қызметкердің отбасында үй шаруасына көмектескен. 1931 жылы Ұлыбританияда өткен кештердің бірінде болашақ жары Норманмен танысады. Норман британ армиясының подполковнигі болған.
Кейін ерлі-зайыптылар Гонконгқа көшіп, сол жерде Этель балабақша ашқан. Отбасында екі қыз дүниеге келген, алайда екеуі де анасынан бұрын қайтыс болған. Норман 1976 жылы өмірден өтті. Этельдің әпкелерінің бірі Глэдис 104 жасқа дейін өмір сүрген.
Этель Катерхэм 97 жасқа дейін көлік жүргізген. 2020 жылы ол 110 жасында коронавирус жұқтырып, COVID-19-дан аман қалған ең қарт адамдардың бірі атанды.
Өткен жылдың қыркүйегінде оның 116 жасқа толуына орай Ұлыбритания королі III Карл арнайы барып құттықтаған. Кездесу кезінде Этель 1969 жылы Карл 21 жасында Уэльс ханзадасы атанғанда көптеген қыздың оған ғашық болғанын әзілмен еске алған.
2025 жылы Этель Катерхэм ұзақ өмір сүруінің сырын да бөліскен.
«Ешкіммен дауласпаймын. Бәрін тыңдап аламын да, өзім қалағандай істеймін»», – деген ол.
Ал тарихтағы ең ұзақ өмір сүрген адам атағы франциялық Жанна Кальманға тиесілі. Ол 1875 жылғы 21 ақпанда Францияның Арль қаласында дүниеге келген.
Жанна Кальман ауқатты отбасынан шыққан. Оның әкесі дүкен ұстаған. 1888 жылы сол дүкенде ол әйгілі суретші Винсент ван Гогты көрген.
Жанна 21 жасында өзінің туысына тұрмысқа шыққан. Олардың қызы 36 жасында пневмониядан қайтыс болған. Кальман 85 жасында семсерлесуді үйрене бастаған, ал 100 жасында әлі де велосипед тепкен.
Ол 1997 жылы 122 жас 164 күнге қараған шағында қайтыс болды.
Толық нұсқасына гиперсілтеме беруді ұмытпаңыз: https://turkystan.kz/article/287170-alemdegi-en-qart-adam-bugin-117-zasqa-toldy
