Әне-міне дегенше жаздың екі айын да артта тастауға жақын тұрмыз. Бұл егіншілікте жиын-терінге маңыз берілетін мезгіл. Осы орайда аудан әкімдігі ауыл шаруашылығы бөлімінің басшысы Ернұр Нәдірғожинмен бірге Биназар ауылдық округі «Шоқан» шаруа қожалығының егіс алқабын аралап қайттық.
«Шоқан» шаруа қожалығының төрағасы Ерлан Төлендиев биыл арпа өсіруге ден қойғандарын айтты. Атап айтқанда, 8 гектарға арпаның әр гектарына 200 киллограмм тұқым сепкен. Бұйырса гектарына кемі 2 -3 тонна арпа жинап алуды көздейді. Біз барған кезде арпаның алқабына орақ түскелі жатыр екен. Егістікті оруға арналған ауыл шаруашылық техникалары талапқа сай. Арпа алқабында жаз бойы 2 сушы еңбек еткен. Олардың төккен терлері ақталып келе жатыр, егіс алқабының өнімділігі жақсы. Арпаның берекелді алқабында тұрмыз. Бабаларымыз айтып кеткен, «Арпа бидай ас екен, алтын –күміс тас екен» деген нақылы еске түседі. Ерте көктемде егіс алқабында тіршілікті бастаған төраға Ерлан Жақсылықұлы енді міне өздері баптаған арпаның жиын-терініне куә болғалы отыр. Талай жылдан бері ауыл шаруашылығының ыстық-суығына төзіп келе жатқан жігіт сабырлы. Артық сөзге жоқ, істің адамы. Біз егіс басынан Ерланның досы әрі серіктесі Бауыржан Досыбаевты кездестірдік. Ол да осы шаруашылықтың ісі алға басып, айы оңынан туса деген ниетпен жүр. Айта кетерлігі екеуінің әкелері араларынан қыл өтпейтін достар екен. Сол сыйластықтың алтын жібін Ерлан мен Бауыржан да үзбей жалғап келеді. Егер әр гектарына орта есеппен 25 центнерден өнім жиналса, 8 гектардан 2 миллион теңгеге жуық табыс табуға болады. Бірақ, Ерлан арпадан табыс табуды межелеп отырған жоқ. Өзінің жылқылары мен қойларына қыстың қытымыр күндерінде арпа –бидай беріп, қоңын көтеріп алуды ойлайды. Өз малына жеткілікті бидай өнімін де сатып алуды көздейді.
Арпа алқабынан бөлек бұл шаруашылық жоңышқаға да мән берген. 15 гектарға көпжылдық шөп егіп, жақсы өнімге қол жеткізіп отыр. «Шоқан» шаруа қожалығы төрт-түлік малды тегіс өсіріп, барлық күтімін жасап отыр. Жылқы екі жүзге жуықтаса, сиыр саны жүз бастан асады. Түйені де өз төлінен өсіріп жатыр. Қой мен ешкі саны да мың басқа жетіп қалады. «Шоқан» шаруа қожалығын 2003 жылы Ерланның әкесі Жақсылық Төлендиев ашқан. Сол кезде ол 40 жастағы еңбекқор азамат екен. Балаларымның болашағына жақсы қолдау болсын деп ойлаған әке үміті ақталды. «Жақсы бала әкенің жердегі басын төрге сүйрейді» демекші, әкесінің бастаған кәсібін Ерлан жалғастырып әкетті. Өзінің шаруа қожалықты басқаруға, кәсіпкерлікті дамытуға қызығушылығы болды. Қазіргі таңда Жақсылық Төлендиев балаларының ісіне тілеулес болып, кезінде бастап берген берекелі іске тілеулес болып жүр. 13-14 жылдан бері Ерлан шаруа қожалықтың тізгінін өз қолына алған. Бір ғана ауыл шаруашылығымен шектеліп қалмай, Бірлік ауылының шыға берісінен мейрамхана, Биназар ауылынан үлкен жолдың бойынан кафе ашты. Шүкір қазір ол кәсіптері де алға басып келеді.
– Жақсылық әкем мен Құралай анам осы шаруа қожалықты ашып, мейрамхананың да іргесін қалап берді. Біз балалары қазір сол істі жалғастырып, дамытып жатырмыз. Әрине, ауыл шаруашылығынан табыс табу қазіргі таңда қиындап барады. Дегенмен, бар ынтаңды салып, жер анаға көңіл бөлсең, тер төксең, оның жемісі болады. Қазіргі таңда 8 адам тұрақты жұмыспен, одан бөлек 20 адам маусымдық еңбекпен қамтылған. Олардың орташа айлық жалақылары 200 мың теңгені құрайды. Жұмысты үйлестіру, еңбеккерлердің жалақысын табу, жағдайын жасау – оңай шаруа емес. Шаруа қожалықтың жұмысын жүргізу үшін ақша көзін қарастырып, аудан, облыс деңгейіндегі ауыл шаруашылығы мен кәсіпкерлікке қатысты мекемелермен тығыз байланысып, жұмысты сәтті жүргізіп жатырмыз. Ауылдағы түрлі іс-шараларға демеушілік жасаймыз. Біз ісімізді дамытқан сайын, елге пайдамыз тиюі керек екенін түсінеміз, дейді төраға Ерлан Төлендиев.
– Аудан аумағындағы жұмысы жақсы жолға қойылған шаруа қожалықтың бірі осы – «Шоқан». Өздеріңіз көргендей, жұмыстары жүйелі, техникалары талапқа сай. Төрт-түлік мал өсіріп, олардың жем — шөбін өздерінің алқабынан әзірлеуге күш салып келеді. Әкенің ісін жалғаған, істің көзін тапқан Ерланға ауылдастары да дән риза. «Елде болса, ерніңе тиеді» дегендей, «Шоқан» шаруа қожалығының дамуы ауылдастарға да өз пайдасын әкелуде. Мұндай шаруа қожалыққа көп көлемде несие беру де жеңіл. Екінші деңгейлі банктер мен кәсіпкерлік орталықтары мұндай шаруашылықтармен қуана жұмыс істейді. Ерланның бір ғана ауыл шаруашылығымен шектелмей, кәсіпкерлікті жолға қоюға ұмтылыс жасауы қуантады. Біз де осы жас жігітке әрқашан сенім артамыз,- дейді аудан әкімдігі ауыл шаруашылығы бөлімінің басшысы Ернұр Нәдірғожин.
Есет ДОСАЛЫ,
Мойынқұм ауданы
