Биыл өңірімізде балалардың жазғы демалысы қызықты ұйымдастырылуда. Айта кетерлігі, биылғы демалыстың жылдағыдан ерекшелігі – лагердегі демалып жатқан балалардың қатары Арыс қаласынан келген жеткіншектермен толығуда, – деп хабарлайды «shanyraqinfo.kz» ақпарат агенттігі.
Мәселен бұған дейін 101 арыстық оқушылар Жамбыл ауданы Жасөркен ауылының аумағында орналасқан «Болашақ» сауықтыру лагеріне жіберілсе, Жуалы ауданындағы «Тау самалы» сауықтыру кешені мен «Бәйтерек» лагерінде 16 бала демалып жатыр. Жақында тағы да 100 шақты жасөспірім өз өңірімізге тынығуға келді. Оларды облыстық білім басқармасы басшысының орынбасары Жәмила Бекбатырова мектеп олимпиадаларын және мектептен тыс іс-шараларды өткізетін облыстық орталықта өзі бас болып күтіп алады. Көршілес облыстан келген балақайларға алдымен бал татыған балмұздақ таратылып, аталған орталықтың өнерлі шәкіртері тарапынан концерттік бағдарлама ұсынылды. Шара барысында Жәмила Елеуқызы арыстық жеткіншектерге жылы лебізін арнап, жазғы демалысында жаңа достар табуға тілектестік білдірді.
– Біздегі демалыс лагерінде тынығуға келген балалардың жас ерекшеліктері ескеріліп, оларға демалуға қажетті спорттық, шомылу киімдері мен гигиеналық заттар, аяқ киім, бас киімдер үлестірілді. Жазғы демалыс лагерлерінде оқушылардың шығармашылық әлеуетін дамытуға, олардың мәдени-рухани білімін жетілдіруіне барлық жағдай жасалған, – деді Ж.Бекбатырова.
Өңірімізге келген 100 баланың-15-і Т.Рысқұлов, 30-ы Меркі, 20-сы Байзақ, қалғаны Жуалы ауданына жөнелтілді. Олар аталған аудандардағы жазғы демалыс лагерінде 20 күннен астам тынығу барысында түрлі қойылымдар мен өзге де танымдық кештер тамашалап, спорттық ойындар мен әртүрлі үйірмелерге қатысатын болады.
Жалпы, зардап шеккен азаматтарға қолдау көрсету бойынша «Арыс. Біз біргеміз!» республикалық акциясы аясында Тараз қаласында 4 қабылдау пункті ашылды. Нұр Отан партиясының облыстық және аудандық филиалдарындағы арнайы пункттерде жиналған көмек материалдары, азық-түлік пен бірінші қажеттіліктегі заттар Арысқа жеткізілді. Бүгінге дейін барлығы 400 тоннадан астам гуманитарлық көмек, азық-түлік, тұрмысқа қажетті бұйымдар жөнелтілген. Ол ғана емес, тұрғындарға медициналық көмек көрсету үшін 2,2 миллион теңгеге қажетті дәрі-дәрмегімен қамтылған арнайы жасақталған 4 реанимобильмен 8 фельдшер Арыс қаласына жіберілген. Қазіргі таңда «Әулие Ата – Демеу» қайырымдылық қорына бюджеттік мекемелер мен кәсіпорындардан қаржылар аударылуда. Арыс қаласындағы төтенше жағдайға байланысты облыс тарапынан көрсетілетін гуманитарлық көмек әлі де жалғасуда.
