24 қазан — Кітапханашылар күні. Бұл күн төл мереке ғана емес, осы мамандықтың маңыздылығын мойындау күні. Кітапханашылар бірнеше жылдар бойы халық қазынасы – кітаптарды қамқорлыққа алады. Қызығы мен қиындығы мол кітапханашы мамандығы туралы бір-ақ ауыз сөзбен жеткізу мүмкін емес, жұрт көп біле бермейтін, көп елене бермейтін, бірақ дүйім оқырманның кітап жайлы бағыт-бағдар алуы үшін жан-тәнімен қызмет атқарып жатқан кітапханашылардың еңбегі ұшан-теңіз.
Бүгін аудандық мәдениет үйінде мерекелік іс -шара өтті. Кеште аудан әкімі Сәкен Мамытов, аудандық мәслихат аппаратының басшысы Бақыт Жұмағұлов, қарымды қаламгер Бергентай Нұрмаханұлы мен «AMANAT» партиясы аудандық филиалының төрағасы Мұратбек Есмұрзаев құттықтау сөз сөйлеп, кітапханашылардың қоғамдағы рөліне тоқталды. Кеш барысынба бірқатар сала мамандарына түрлі марапаттар тапсырылып, естелік сыйлықтар тарту етілді.
Аудандық мәдениет үйінің әншілері Раушан Қадырбекова «Кітапханашылар», Диана Сейдіш «Қазағым» атты әндерін шырқаса, ақын Самат Тоқбанов
кітапханашыларға арнап жырдан шашу шашты. Сонымен қатар, экранда «Кітапханашы – рухани қазына сақшысы» атты арнайы бейнебаян көрсетілді.
Кітапхана — халық қазынасы, ал кітапханашы — сол қазынаның иесі мен сақтаушысы. Барлық кітапханашылардың кәсіби мерекелері құтты болсын.
