https://turkystan.kz/article/259069-oltirip-algan-symkentte-oqusy-zumbaq-zagdaida-koz-zumdy
Әлеуметтік желіде ер адам 28 ақпанда дене қызуы көтерілген бауырын жедел жәрдем қызметі Шымкенттегі жұқпалы аурулар ауруханасына алып кеткенін айтты. Алайда 2 сағаттан соң ауруханаға өз аяғымен кірген бауырының денесін алып шыққан. Туыстары фельдшер мен аурухана дәрігерлерінің жұмысына бейжай қарағанына шағымданды. Жақындарының айтуынша, 4-сыныпта оқитын балақайды ауруханаға жатқызбай тұрып оған дәрі еккен. Ал сот сараптамасында ол дәрінің атауы да жазылмағанын айтты. Олар жергілікті тергеу органдарынан әділдікті талап етіп, дәрігерлердің жазасыз қалып кетпеуін сұрады. Бұл туралы Stan.kz ақпарат агентігі хабарлайды.
Марқұмның жақындары 4-сыныпта оқитын інісінің қазасында бір шикіліктің барып айтып, дәрігелерді айыптап отыр.
Туыстарының айтуынша, бауырын ауруханаға алып кетпей тұрып, фельдшер қызу басатын дәрі еккен. Бірақ бір уақытта фельдшер дереу ауруханаға апару керек екенін айтқан.
«28 ақпан кешкі 18:30 шамасында жедел жәрдем шақырған едік. Інім марқұм Әбдірасіл Аршын Маратұлының дене қызуы 40°C үстінде болған. Фелдшер сымағымыз келіп қан тапсырып алмастан бұрын аналгин (ауырсынуды басатын және қызуды түсіретін дәрі) мен димедрол (антигистаминдік «аллергияға қарсы» дәрі) салған. Фельдшер оның денесі тырысып қалуы мүмкін деп Шымкент қалалық жұқпалы аурулар ауруханасына салып алып кетті. Жанында әкем болған. Ауруханаға жеткеннен кейін інім өз аяғымен ішке кіріп кеткен. Сол жердегі санитар әйел қабылдап алған. Дәрігерлерден ешкім болмаған. Ауруханада жөндеу жұмыстары жүріп жатқан екен», – деді марқұмның ағасы.
Ер адамның айтуынша, балақайдың әкесіне дәрігерлер “палатаға жатқызамыз, қайта беріңіз” деп есігін жауып алған.
«19:45 шамасында анама дәрігер әйел хабарласып, ініме қандай укол салған еді деп сұраған. Анам «Балам қайда? Сөйлесейін, жақсы ма?» деп сұраса, «жақсы, системада жатыр» деп жауап берген. Арада 2 сағат өткеннен кейін хабарласып балаларыңыз реанимацияға түсіп қалды деп хабарлады. Барсақ інім қайтыс болып кеткен. Денесі жаңа көз жұмған адамның денесі емес. Бұлар тастап кеткен кезде-ақ өлтіріп алған. Қайдан екпе пен препарат салынғанын білмейміз. Амалдың жоғынан сот медициналық экспертизасын жасаттық. Сараптамаға баланың миында ісік бар деп жазып бере салыпты. Салынған дәрілердің тізімі жоқ, қай уақытта өлгеніне дейін өтірік жазылған», – деді марқұмның ағасы.
Марқұмның ағасы бауырының бұған дейін мүлдем ауырмағанын және медициналық тексерістерден де жақсы өткенін атап өтті.
«Іс материалдарында да фелдшердің қандай дәрі еккені жазылмаған. Біз әділдікті талап етеміз. Аурухананың бас дәрігері, реаниматологы, хирургы, сол күні ауысымда болған дәрігерлердің жауапқа тартылуын, қандай жағдаймен өлтіріп алғанын мойындауларын талап етеміз. Бауырым дәрігерлердің қолынан қаза тапты», – деді марқұмның ағасы.
Марқұм балақайдың туған әпкесі Ақбота Абдрахман да бауырының денсаулығында мүлдем кінәрат болмағанын айтады. Әпкесі інісінің мектепте де үлгілі оқушы болып, сабақтан «ауырып қалдым» деген сылтаумен еш себепсіз қалмағанын жеткізді.
«Іс материалдарында інімді екі күн бойы ауырып, келесі күні ауруханаға ауыр халде түсті деп жазып қойыпты. Алайда ініммен бір күнде осындай қайғылы жағдай болып отыр. Сол кездегі дәрігерлердің өзі балаларыңыз бізге ауыр халде түсіпті деп басын ала қашқан. Енді ауруханадағы бейнекамераларды қараймыз. Бірақ бір ай бұрын өтіп кеткен іске олардың ақ-қарасын айтатынына күмәнім бар», – деп жылады марқұмның әпкесі Ақбота Абдрахман.
Әпкесі тергеушілер бұл істі дұрыс қарап жатпағанын және сот медициналық сарапшысының тағайындаған нәтижесіне келіспейтінін де атап өтті.
«Енді Астанаға барып, бауырымның жаны мен қаны үшін аяғына дейін барамын. Бауырым тектен-тек дәрігерлердің қолына қаза тауып отыр. Бұл оқиғада ешкімнің ешнәрсесі кетіп, қиналып отырған жоқ. Шыбын құрлы елемей отыр. Дәрігерлер келіп, жағдайды да түсіндірген жоқ. Өздері бауырымның ауыр халде келгенін алға тартады. Отбасымыз болып әділдікті талап етеміз. Адам өлімі, шыбын өліміндей болып қала бере ме сонда?! Өздерінің бала-шағалары да бар емес пе?» – деді марқұмның әпкесі Ақбота Абдрахман.
