Маңғыстау облысында 71 блогердің шоттарынан 12,9 миллиард теңге сәйкессіздіктер анықталды. Бұл туралы Маңғыстау облысы бойынша Мемлекеттік кірістер департаменті хабарлады.
Мемлекеттік кірістер департаментінің мәліметінше, салық міндеттемелерін толық орындау мақсатында блогерлерді қоса алғанда, жеке тұлғаларға салықтық әкімшілендіру тұрақты түрде жүргізіліп жатқаны хабарланып келді. Алайда, бақылау шараларының нәтижесінде сәйкессіздіктер анықталды.
— Маңғыстау облысында түрлі ақпарат көздерінен алынған деректерді ұсынылған салық декларацияларының мәліметтерімен салыстыру қорытындысы бойынша 71 тұлғаға 12,9 миллиард теңгеге сәйкессіздіктер табылды. Соған сәйкес, осы азаматтарға ағымдағы жылдың 13-14 ақпаны аралығында «кірістерді төмендету» бұзушылықтары бойынша, камералдық бақылау хабарламалары жіберілді, — делінген департамент ұсынған хабарламада.
Ал, хабарламаны орындау мақсатында дербес есептелген салықтарды төлей отырып, қосымша салық есептілігі тапсырылуы тиіс. Ол үшін 30 күн уақыт берілген. Келіспеген жағдайда түсіндірмені ұсыну қажет.
Департамент мамандары сонымен қатар, табыс алу кезінде салықтарды төлеу қажеттілігіне, оның ішінде әртүрлі интернет-ресурстарында онлайн-жарнамаларды жариялауға (ақпараттық өнімдерді жылжыту немесе сату, әртүрлі оқыту курстарын сату, ұтыс ойындарын өткізу және т.б.) назар аударады.
inform.kz
