Қазақстандағы пойыздарға интернет қосылады: жаз соңына дейін қай бағыттарда желі пайда болады?

ҚТЖ жолаушылары алдағы уақытта жол үстінде де байланыста бола алады. «Қазақстан темір жолы» ҰК» АҚ басқарма төрағасының орынбасары Әнуар Ахметжанов спутниктік интернет терминалдарын орнатуға бағытталған ауқымды жоба туралы айтты, деп хабарлайды Qaz365.kz.

Компания өкілдері жолда байланыс болмауына қатысты сынның болғаны орынды екенін мойындайды. Сондықтан бұл мәселені шешуге бел шешіп кіріскен. Өткен жылы теміржолшылар жаңа технологияларды сынақтан өткізу кезеңін аяқтаған.

«Бүгінгі заманда интернетсіз өмір сүру өте қиын, мұны біз жақсы түсінеміз. Өткен жылы біз OneWeb және Starlink сияқты спутниктік жүйелерді пайдалана отырып, екі ірі пилоттық жобаны жүзеге асырдық. Әрине, бізге бұл жүйелердің қажетті қызметті көрсете алатынын техникалық тұрғыдан тексеру қажет болды. Сынақ нәтижелері пойыздарда интернет орнатуға болатынын көрсетті», – деді Әнуар Ахметжанов.

Оның айтуынша, қазір компания сынақ кезеңінен нақты енгізу жұмысына көшкен. Бұл тапсырма ел басшылығының тапсырмасына сәйкес жүзеге асырылып жатыр. Алдымен жолаушы ең көп жүретін бағыттар таңдалған.

«Бүгінде біз ұлттық тасымалдаушының жолаушылар пойыздарын интернетпен қамтамасыз ету бойынша ауқымды жұмысты бастап кеттік. Қазірдің өзінде бір құрам толық байланыспен қамтылды. Қазіргі уақытта Алматы, Павлодар, Түркістан және басқа да қалалар бағытында жүретін пойыздарға терминалдар орнатылып жатыр. Біз ең алдымен халық көп пайдаланатын пойыздарды аламыз, сол арқылы жолаушыларымыз жаңа мүмкіндікті сынап көре алады», – деді Әнуар Ахметжанов.

Компания алдағы айларда пойыздардағы цифрлық байланыстың үзілу мәселесін толық шешуді жоспарлап отыр.

«Жоспарымыз бойынша, жаз соңына дейін негізгі барлық бағыттарды спутниктік интернетпен қамтамасыз етуді көздеп отырмыз», – деп сөзін түйіндеді ол.

Фото: ҚТЖ

https://qaz365.kz/society/18722-kazakstandagy-poiyzdarga-internet-kosylady-zhaz-sonyna-deiin-kai-bagyttarda-zheli-paida-bolady/