Қазақстан және Қырғызстан Республикасының еңбек сіңірген қайраткері, композитор — Илья Жақановтың 90 жас мерейтойына арналған шаралар легі Ақтоғай ауылында арнайы шығармашылық тұрғын үйдің салтанатты ашылу рәсімімен жалғасты. Тағылымды іс-шараға аудан әкімі, Қазақстан Республикасы Парламенті Мәжілісінің депутаттары, облыстық ардагерлер кеңесінің өкілдері, зиялы қауым, мәдениет және өнер қайраткерлері, ауыл тұрғындары мен БАҚ өкілдері қатысты.
Салтанатты рәсім барысында Жамбыл облысы әкімі аппаратының басшысы Лесбек Ілебаев құттықтау сөз сөйлеп, Илья Жақановтың қазақ руханияты мен ұлттық өнерді дамыту жолындағы өлшеусіз еңбегіне тоқталды. Сонымен қатар, жаңа шығармашылық үйдің ел мәдениетіне қызмет ететін рухани ордаға айналатынын атап өтті.Іс-шара барысында Қазақстан Республикасы Мәжілісінің депутаты, «Илья Жақанов» қорының президенті Ерболат Саурықов та сөз алып, тұрғын үй құрылысына қолдау көрсеткен азаматтарға алғысын білдірді. Сондай-ақ, облыстық ардагерлер кеңесінің төрағасы Еркінбек Солтыбаев та даңқты тұлғаға жылы лебізін арнады.
Жаңа үйдің лентасын ҚР Парламенті Мәжілісінің депутаты Ерболат Саурықов, еңбек ардагері Әбдіманап Көпбергенов, облыстық ардагерлер кеңесінің төрағасы Еркінбек Солтыбаев салтанатты жағдайда қиылып, жаңа үйдің кілті Илья Жақановқа табысталды. Ақ жаулықты аналар шашу шашып, көпшілік қауым қоныс той қуанышына ортақтасты.Айта кету керек, бұл шығармашылық үйдің бой көтеруіне ел азаматтары мен ауыл тұрғындары бірлесе атсалысып, туған жер перзентіне деген құрметтің айқын үлгісін көрсетті. Илья Жақанов — қазақ музыка өнерінің тарихын терең зерттеп, ұлттық мұраны кейінгі ұрпаққа жеткізген көрнекті тұлға. Оның «Жайлаукөл кештері» сынды халық жүрегінен орын алған әндері мен шығармалары қазақ мәдениетінің алтын қорына енген. Жаңа шығармашылық шаңырақ ұлт руханиятына қызмет етіп, кейінгі буынға тағылым беретін қасиетті орын болмақ.