«Мектептен өткені жөн»: Димаш Құдайбергеннің анасы жастардың бөлек тұруына көзқарасын білдірді
Әнші, ҚР еңбек сіңірген қайраткері Светлана Айтбаева ұлы Димаш Құдайбергеннің жары “қандай болғанын қалайсыз?”деген сұраққа жауап берді. Бұл туралы Stan.kz ақпарат агенттігі хабарлайды.
Өнер иесінің айтуынша, ол үшін ең бастысы – ұлының бақыты мен екі жастың өзара түсіністігі. Сондықтан әнші ұлы мен болашақ келінінің бір-бірін сөзсіз ұғып, еркін тіл табыса алғанын, қол ұстасып бір бағытта қатар жүретін серік тапқанын қалайды.
“Жақсы сөз жарым ырыс” дейміз ғой. Көпшіліктің тілеуі, біздің де күтіп жүрген әдемі сәтіміз. Ең алдымен, Димашқа ұнайтын, бірін-бірі түсінетін болса. Міндетті түрде тәрбиелі, білімді, ақылды, адал жар болса деп тілеймін”, – деді ол.
Сондай-ақ әнші бүгінде жиі талқыланатын тақырыптардың бірі – жастардың бөлек тұруына қатысты сауалға да өз көзқарасын білдірді. Оның сөзінше, бұл әркімнің жұмыс жағдайына байланысты.
“Қазіргі жастарды күштеп ештеңеге мәжбүрлеуге болмайды. “Бәрін тастап, бізбен бір жыл тұрыңдар” деу дұрыс емес. Олардың жұмысы да, оқуы да болуы мүмкін. Дегенмен жаңа түскен келін сол әулеттің тәрбиесін көруі керек деп ойлаймын. Ағайын-туыспен араласып, қонақ күтіп, дастарқан жаю секілді әдемі бір мектептен өткені жөн. Ал бөлек тұра ма, бірге тұра ма – ол заманға да, әр отбасының өз тәртібіне де байланысты. Бірақ қандай жағдайда да сол әулеттің дәстүрімен танысқаны дұрыс”, – деді ол.
ОқыңызАйта кетейік, бұған дейін Димаш Құдайберген неге үйленбей жүргенін ашық айтқаны хабарланған еді. Оның айтуынша, оған “Қашан үйленесің?” деген сұрақты Қазақстанға келген сайын әуежайдағы паспорттық бақылау қызметкерлерінен бастап, айналасындағы адамның бәрі қояды. Әнші мұндай маңызды дүниелерге үлкен жауапкершілікпен қарайтынын айтты. Ол уақытша сезімге еріп, қыз баланың тағдырын бұзып аламын ба деп қорқатынын жасырмады.
Сонымен қатар ол қазақстандықтарды қыз-келіншектер мен әйелдерге барынша қамқорлықпен қарауға шақырды.
