Қордай ауданында «AMANAT» партиясы Жамбыл облыстық филиалы жанындағы Әйелдер қанатының ұйымдастыруымен «Ауыл әйелі – ауыл экономикасы» форумы өтті. Ауқымды іс-шараға ауданның кәсіпкер әйелдері, қоғам белсенділері, түрлі салада көшбасшылық танытып жүрген нәзік жандылар қатысты.
Іс-шара аясында ауыл шаруашылығы өнімдерінің көрмесі мен жәрмеңкесі ұйымдастырылып, қатысушылар өңірдегі табысты кәсіпкер әйелдердің өнімдерімен және жұмыс тәжірибесімен танысты.
Пленарлық отырыста әйелдер көшбасшылығы, ауыл кәсіпкерлігін дамыту, агробизнес жүргізу, отбасылық шаруашылықты өркендету, мемлекеттік қолдау бағдарламалары, гранттық қаржыландыру мүмкіндіктері және бизнес-жоспар әзірлеу мәселелері жан-жақты талқыланды.
Сондай-ақ тәжірибе алаңында кәсіпкер әйелдер өздерінің жетістікке жету жолдарын бөлісіп, жастар мен әйелдердің экономикалық бастамаларын қолдау бағытындағы тиімді тәжірибелерін ұсынды. Форум қорытындысында ауыл экономикасының дамуына елеулі үлес қосып жүрген белсенді әрі табысты кәсіпкер әйелдер марапатталды.