Ғаламтор
Прокурор Жанәбіловтерді бірнеше жылға бас бостандығынан айыруды сұрады: 22 сәуір 2026, жаңалықтар Turkystan.kz
Ерлі-зайыпты Жанәбіловтердің сотында жарыссөз басталды. Прокурордың аға көмекшісі Олжас Хайруллаев блогерлер Ерболат Жанәбілов пен Эльмира Төлегеноваға нақты бас бостандығынан айыру жазасын сұрады, деп хабарлайды turkystan.kz.
Мемлекеттік айыптаушының айтуынша, бұдан жеңілірек жаза заңдылық пен әділеттілік қағидаттарына сай келмейді.
«Бас бостандығынан айырудан жеңілірек жаза түрін қолдану айыпталушыларды қоғамнан оқшаулаусыз түзетуді қамтамасыз етпейді және жаңа қылмыстардың алдын алу функциясын орындамайды. Нақты бас бостандығынан айыру жазасын тағайындау – әлеуметтік әділеттілікті қалпына келтіре алатын жалғыз жаза түрі», – деді ол.
Айыптау тарапы жеңілдететін мән-жай ретінде айыпталушылардың кәмелетке толмаған балаларының бар екенін ескеруді сұрады. Ал ауырлататын мән-жайлар анықталмаған.
Tengrinews.kz мәліметінше, Прокурор Ерболат Жанәбіловті Қылмыстық кодекстің екі бабы бойынша кінәлі деп тануды сұрады.
214-баптың 2-бөлігінің 2-тармағы бойынша оған мүлкін тәркілей отырып, 2 жыл 6 ай бас бостандығынан айыру жазасын сұрады. Ал 218-баптың 2-бөлігінің 1-тармағы бойынша — мүлкін тәркілей отырып, 4 жыл бас бостандығынан айыру жазасын сұрады.
Айыптау тарапы Жанәбіловке түпкілікті түрде мүлкін тәркілей отырып, ең төменгі қауіпсіздік мекемесінде 4 жыл бас бостандығынан айыру жазасын тағайындауды сұрады.
Сондай-ақ прокурор бұлтартпау шарасын үйқамақтан қамауға өзгертіп, оны сот залында қамауға алуды сұрады.
Прокурор Эльмира Төлегеноваға да осындай жаза сұрады.
Айыптау тарапы оны мүлкін тәркілей отырып, 4 жыл бас бостандығынан айыруға үкім шығаруды сұрайды. Сонымен қатар Хайруллаев Қылмыстық кодекстің 74-бабына сәйкес жазаны өтеуді бір жылға кейінге қалдыруды өтінді.
Төлегеноваға қатысты бұлтартпау шарасын үкім заңды күшіне енгенге дейін үйқамақтан ешқайда кетпеу туралы қолхатқа өзгерту ұсынылды.
14 сәуірде сотта блогер Эльмира Толегенова кінәсін ішінара мойындады. Бұған дейін сот процесінде блогер Ерболат Жанәбілов те жауап беріп, сотта жылап, кінәсін ішінара мойындаған еді.
Толық нұсқасына гиперсілтеме беруді ұмытпаңыз: https://turkystan.kz/article/280231-prokuror-zanabilovterdi-birnese-zylga-bas-bostandygynan-aiyrudy-surady
