Қордай ауданында заңсыз иемденілген активтерді мемлекетке қайтару жұмыстары аясында қайтарылған қаражат есебінен жүзеге асырылып жатқан су құбыры құрылысы жалғасуда.
Жоба барысымен танысу мақсатында Жамбыл облысының прокуроры Жандос Әбдиев құрылыс алаңына барып, жұмыстардың қарқынын тексерді. Сонымен қатар жауапты мамандардың атқарылған жұмыстар мен алдағы міндеттер жөніндегі ақпаратын тыңдады.
Қазіргі таңда нысанның құрылыс жұмыстары 65 пайызға орындалған. Жоба аясында ішкі су құбыры желілерін тарту жұмыстары аяқталып, әрқайсысының сыйымдылығы 500 текше метр болатын екі таза су резервуары салынды. Су алу аумағы толық қоршалып, нысанның қауіпсіздігін қамтамасыз ету үшін тәулік бойы күзет ұйымдастырылған.
Жобаның жалпы құны 2,4 миллиард теңгені құрайды. Бүгінде бөлінген қаражаттың 75 пайызы игерілді. Құрылыс-монтаж жұмыстары бекітілген жоспар-кестеге сәйкес жүргізілуде.
Нысанды жыл соңына дейін аяқтап, пайдалануға беру жоспарланып отыр. Жоба толық іске қосылғаннан кейін Қордай ауданының тұрғындары сапалы әрі тұрақты ауыз сумен қамтамасыз етіледі.
Жамбыл облысында сумен жабдықтау инфрақұрылымын дамыту бағытындағы жұмыстар жүйелі түрде жалғасуда. Қазіргі уақытқа дейін өңірде 15 ауыз сумен қамту нысанының құрылысы аяқталған. Нәтижесінде Тараз қаласы мен облыстың жеті ауданындағы шамамен 28 мың тұрғын сапалы ауыз суға қол жеткізді.
Мұндай жобалардың жүзеге асуы елді мекендердің инженерлік-коммуналдық инфрақұрылымын жаңғыртып, халықтың тұрмыс сапасын арттыруға мүмкіндік береді.
https://baq-orda.kz
