Сайлау кезеңінде саяси партиялардың бағдарламалары қоғам назарындағы маңызды мәселелердің біріне айналады. Себебі кез келген партияның ұстанымы мен елдің болашағына қатысты көзқарасы ең алдымен оның бағдарламасында көрініс табады.
Құрылтай депутаттарының сайлауы да партиялардың өз бағдарламаларын ұсынып, қоғамға негізгі басымдықтарын таныстыруымен ерекшеленеді. Бұл – сайлаушы үшін әртүрлі ұсыныстармен танысып, партиялардың ұстанымдарын салыстыруға мүмкіндік беретін кезең.
Бүгінде қоғамның сұранысы да өзгеріп келеді. Азаматтарды әлеуметтік мәселелермен қатар, жаңа жұмыс орындары, кәсіпкерлікті дамыту, экономикалық өсім, білім мен денсаулық сақтау сапасы, өңірлердің дамуы сияқты нақты мәселелер толғандырады.
Сондықтан партиялық бағдарламаларды бағалағанда тек көтерілген мәселелерге емес, оларды шешудің нақты жолдарына да назар аударған жөн. Ұсыныстың қаншалықты негізді екені, оны жүзеге асыру тетігі және қоғамға берер нәтижесі маңызды.
Әрине, кез келген бастаманың жүзеге асуы елдің экономикалық мүмкіндігіне, мемлекеттік бюджетке және қолданыстағы заңнамаға байланысты. Осы факторларды ескеріп ұсынылған бағдарлама ғана шынайы нәтижеге бағытталған деп бағалауға болады.
Меніңше, сайлауалды кезеңнің маңызы – партиялардың өз бағдарламаларын таныстыруымен ғана шектелмейді. Бұл – қоғамның қандай мәселелерді бірінші орынға қоятынын анықтайтын, азаматтардың талап-тілектері мен саяси ұсыныстар тоғысатын маңызды кезең.
Құрылтайдың алдағы жұмысында сайлауалды бағдарламаларда көтерілген бастамалардың қаншасы нақты заңнамалық ұсыныстарға айналатыны да маңызды мәселе болмақ.
Сайлаушы үшін ең бастысы – уәденің көптігі емес, оның орындалу мүмкіндігі мен нақты нәтижесі. Сондықтан бағдарламаларды салыстырып, ұсыныстардың мазмұнына мән беру – саналы таңдау жасаудың маңызды шарты.
Анар Қалыбекова, Депутат
