Бұқаралық ақпарат құралдары қызметкерлерінің кәсіби мерекесі қарсаңында Тараз қаласындағы Шоқан Уәлиханов атындағы облыстық ғылыми-әмбебап кітапханасында «Шығармашылық дәстүр жалғастығы және ұрпақтар сабақтастығы» тақырыбында дөңгелек үстел отырысы өтті. Іс-шараны Қазақстан Журналистер одағының Жамбыл облыстық филиалы мен «Мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің Жамбыл облыстық филиалы бірлесіп ұйымдастырды.
Аталған басқосудың басты мақсаты – өңірлік журналистикадағы шығармашылық сабақтастықты нығайту, аға буын қаламгерлердің бай тәжірибесін жас журналистерге насихаттау, сондай-ақ бұқаралық ақпарат құралдары саласындағы кәсіби дәстүрлерді дәріптеу болды.
Жиын барысында облыстық журналистиканың қалыптасу тарихы мен бүгінгі дамуына арналған бейнебаян көрсетіліп, салада еңбек еткен ардагерлер мен қазіргі буын өкілдерінің еңбегі кеңінен таныстырылды.
Дөңгелек үстелдің модераторы, Қазақстан Журналистер одағы Жамбыл облыстық филиалының төрағасы Жаңабай Миллионов құттықтау сөз сөйлеп, журналистика саласының қоғамдағы рөлі мен жауапкершілігіне тоқталды. Сондай-ақ ол бірқатар бұқаралық ақпарат құралдары өкілдеріне кәсіби марапаттар табыстады.
Жамбыл облысы әкімдігінің ақпарат және қоғамдық даму басқармасының басшысы Жанболат Нұрмолдаұлы қатысушыларды кәсіби мерекемен құттықтап, өңірдің ақпараттық кеңістігін дамытудағы журналистердің еңбегін жоғары бағалады.
«Мәдениет, спорт, туризм және ақпарат қызметкерлерінің кәсіптік одағы» қоғамдық бірлестігінің Жамбыл облыстық филиалының төрағасы Дүйсенәлі Бықыбаев өз сөзінде сала қызметкерлерінің әлеуметтік-құқықтық мүдделерін қорғау және кәсіби беделін арттыру бағытындағы жұмыстарға тоқталып, бірқатар журналистерге кәсіподақ марапаттарын табыстады.
Журналистер қауымын құттықтаған «Taraz 24» телеарнасының директоры Зарина Қуатова да шығармашылық ұжымдарға ізгі тілегін білдіріп, бір топ БАҚ өкілдеріне арнайы сыйлықтар тапсырды.
Іс-шараның маңызды сәттерінің бірі – жас журналистердің Қазақстан Журналистер одағы қатарына қабылдануы ерекше әсерлі сәттердің біріне айналды. Жаңа мүшелерге салтанатты түрде мүшелік билеттер табысталып, аға буын өкілдері ізгі тілектерін жеткізді. Бұл рәсім кәсіби дәстүрдің жалғасып, журналистикадағы сабақтастықтың берік сақталып келе жатқанын айқын көрсетті.
Жиын барысында талантты ақынның журналистерге арналған арнау өлеңі оқылып, шығармашылық ортаға ерекше рух берді.
Кездесуде Қазақстанның Еңбек сіңірген қайраткері, халықаралық «Алаш» әдеби сыйлығының лауреаты, жазушы әрі ардагер журналист Көсемәлі Сәттібайұлы, сондай-ақ «AULIEATA-MEDIA» ЖШС бас директоры Данияр Асқарұлы, Шоқан Уәлиханов атындағы облыстық ғылыми-әмбебап кітапханасының директоры Эльмира Әбдинова және ардагер журналист Серік Құралбай кәсіби журналистиканың бүгінгі жай-күйі мен даму бағыттары жөнінде мазмұнды пікірлерін білдірді.
Аталған тұлғалар журналист мамандығының жауапкершілігі, ақпараттық кеңістіктегі өзгерістер және жас мамандарды қолдаудың маңызы туралы ой қозғап, шығармашылық ізденістің үздіксіз жалғасуы қажеттігін атап өтті.
Дөңгелек үстел барысында қатысушылар өңірлік журналистиканың даму үрдісі, ақпараттық қауіпсіздік, кәсіби этика және жас мамандарды қолдау мәселелерін талқылады.
Қорытынды сөз сөйлеген Жаңабай Миллионов мұндай тағылымды басқосулардың журналистика саласындағы ұрпақтар сабақтастығын нығайтудағы және кәсіби қауымдастықты біріктірудегі маңызы зор екенін атап өтті.
Кәсіби мереке қарсаңында өткен тағылымды кездесу журналистикадағы шығармашылық дәстүрдің үзілмейтінін тағы бір мәрте дәлелдеді. Аға буынның тәжірибесі мен жас журналистердің жаңа ізденістері тоғысқан бұл басқосу өңірлік журналистиканың дамуына серпін беріп, ұрпақтар арасындағы байланысты одан әрі нығайта түсті.
