Тараз қаласындағы «Баласағұн» орталық концерт залында Мемлекеттік қызметші күніне арналған салтанатты іс-шара өтті.
Жиында Жамбыл облысының әкімі Ербол Қарашөкеев мемлекеттік қызметшілерді кәсіби мерекесімен құттықтады.
– Мемлекеттік қызмет – халық пен мемлекет алдындағы үлкен жауапкершілік. Мемлекеттік саясаттың тиімді жүзеге асуы мен азаматтардың билікке деген сенімі сіздердің кәсібиліктеріңізге, әділдіктеріңізге және қызметке адалдықтарыңызға тікелей байланысты, – деді өңір басшысы.
Облыс әкімі мемлекеттік қызметшілердің алдында Мемлекет басшысының саясатын, мемлекеттік бағдарламалар мен ұлттық жобаларды жүйелі түрде іске асыру міндеті тұрғанын атап өтті.
Сондай-ақ Президент ұсынған «Халық үніне құлақ асатын мемлекет» тұжырымдамасына ерекше тоқталды. Бұл қағидат мемлекеттік органдардың ашықтығын арттырып, қоғаммен сындарлы диалог орнатуға және тұрғындардың өзекті мәселелерін жедел шешуге бағытталған.
Бүгінде Жамбыл облысының жергілікті атқарушы органдарында 2341 мемлекеттік қызметші еңбек етеді. Олардың 40,7 пайызын әйелдер құрайды.
Мемлекеттік қызметшілердің мансаптық өсуі конкурстық негізде және меритократия қағидаттарына сәйкес жүзеге асырылады. Өңірлік кадр резервіне 25 кандидат қабылданып, олардың 18-і мемлекеттік лауазымдарға тағайындалған.
Салтанатты жиын барысында бірқатар мемлекеттік қызметші мемлекеттік наградалармен, «Облысқа сіңірген еңбегі үшін» төсбелгісімен, Құрмет грамоталарымен және Алғыс хаттармен марапатталды.
Сонымен қатар мемлекеттік қызметшілердің азаматтық және кәсіби тұрғыдан қалыптасуына елеулі үлес қосқан ата-аналар да Алғыс хаттармен марапатталды.
