Бүгін Тараз қаласында Қазақстан онкоурологтар қауымдастығы ұйымдастырған «Онкоурологтар мектебі» аясындағы бағдарламаның екінші күні тың форматты тәжірибелік шарамен жалғасын тапты.
Жамбыл облыстық көпбейінді онкология және хирургия орталығының базасында Live Surgery (тікелей эфирдегі ота) форматында практикалық шеберлік сабағы ұйымдастырылды.
Шара барысында еліміздің жетекші мамандары несеп-жыныс жүйесінің қатерлі ісіктерін хирургиялық емдеудің заманауи әдістерін көрсетті.
Оған Қазақ онкология және радиология ғылыми-зерттеу институтының онкоурология орталығының жетекшісі, PhD, медицина магистрі Хусан Умурзақов, онкоуролог Фарух Халматов және онкохирург Дулат Көкенбаев қатысып, жоғары технологиялық үш бірдей операция жасалды.
Алғашқы науқас бел аймағындағы ауырсынуына байланысты тексеруден өткен кезде, оң бүйрегінен көлемді түзіліс анықталып, зәр шығару жолдарында ақау бары белгілі болды. Қосымша диагностикалық зерттеулер жүргізіліп, жағдайы көпсалалы мамандардың консилиумында жан-жақты қаралғаннан кейін хирургиялық емдеу туралы шешім қабылданды. Шеберлік сабағы аясында лапароскопиялық нефрэктомия мен тамыр аяқшасындағы тромбэктомия сәтті орындалды. Ота сәтті өтіп, науқастың жағдайы қазір қанағаттанарлық.
Екінші науқас — 66 жаста. Тексеру кезінде оның оң жақ бүйрекүсті безінде түзіліс анықталды. Қосымша КТ (контрастпен іш құрылысы және құрсақ арты кеңістігін тексеру), гормоналды профильді зерттеу және эндокринолог кеңесі жүргізілді. Консилиум шешімімен лапароскопиялық адреналэктомия жасауға шешім қабылданып, ота сәтті өтті. Отадан кейінгі кезең асқынусыз өтуде.
Үшінші науқас зәр шығару кезінде қиындықтарға шағымданып келген. Тексеру барысында дәрігерлер қуық асты безінің үлкейгенін және қанда PSA деңгейінің жоғары екенін анықтады. Биопсия нәтижесі бұл науқаста қуық асты безінің қатерлі ісігі бар екенін растады. Қосымша тексерулер жүргізіліп, операцияға дайындалған соң, шеберлік сабағы аясында науқасқа радикалды простатэктомия жасалды. Ота сәтті өтті, қазіргі кезде науқастың жағдайы жақсы, тұрақты.
Барлық операциялар сәтті өтіп, ешқандай асқыну тіркелген жоқ. Бұл — аз инвазивті (жарақаты аз) хирургияның қазіргі жетістіктерін және хирургтардың жоғары кәсіби шеберлігін айқын көрсетті.
Шеберлік сыныбы қатысушылардың үлкен қызығушылығын тудырды. Жамбыл облысының онкологтары ота барысын тікелей эфир арқылы бақылап, білікті мамандармен бірге техникалық әдіс-тәсілдерді, сондай-ақ онкоурологиялық науқастарды емдеудің тиімді жолдарын талқылауға мүмкіндік алды.
Іс-шара ұйымдастырушылары Жамбыл облыстық онкоорталығына «Онкоурологтар мектебін» жоғары деңгейде өткізгені үшін алғыс айтып, онкоурология саласының дамуына үлес қосқан барлық қатысушыларға ризашылықтарын білдірді.
