Ғаусар ғасырлар бұрын ғадауатпен арпалысып, ғазиз ғұмырын бұқараның бейбітшілігі үшін бағыштаған Білге қаған «Ел болып бірігуден асқан бақыт жоқ» десе, «Тату елге — тыныштық пен тоқшылық нәсіп» деп Күлтегіннің кесіп айтқаны бар. Бұл ұғым арада дәуірлер көшіп, жылдар жылжып, айлар аунап, күндер сусылдап өткенімен әлі де өзіндік өзекті мағына биігінен түскен жоқ. Осы қағиданы ұстанған қасиетті Ұлы дала татулықтың темірқазығы, бірліктің бәйтерегі, ынтымақтың ырысханасына айналды. Батаменен өсіп өнген байтақ еліміздің өзгені де өзегіне басқан ақеділ мейірімі бұл күнде қамқорлық пен қайырымдылықтың құтты панасы, дархан пейілдің дара даңғылы десек артық айтқандық емес. Жүздеген ұлттың мыңдаған ұрпағын мейіріміне бөлеген Мәңгілік ел бұл күнде көпшіліктің риясыз рахметі мен кіршіксіз алғысына кенеліп отыр.
1 наурыз – Алғыс айту күні. 2016 жылғы 14 қаңтарда Қазақстан Республикасының Президенті Н.Ә.Назарбаев Қазақстан халқы Ассамблеясының құрылған күні-1 наурызды елімізде Алғыс айту күні деп жариялаған болатын. Алғыс айту күні – күрделі кезеңді иық тіресе бірге еңсеріп, қысқа мерзім ішінде Елбасының басшылығымен Тәуелсіз Қазақстанды құру жолында аянбай тер төккен еліміздің барлық азаматттарының бір-біріне құрмет білдіретін күн. Алғыс айту күні жайлы Елбасы Нұрсұлтан Әбішұлы Назарбаев: «Сталин режимінде әр жылдары, өздеріңіз білетіндей, халықтар түгелдей жер аударылды. Оларды вагондардан ауылдарға тастап кете берді, олардың еш дүниесі болған жоқ. Сол уақытта бұл далада өздері мұқтаж бола отырып, оларды саман үйлеріне қабылдаған қазақтар, қазақ отбасылары ғана өмір сүрді. Саманнан жасалған екі бөлмелі там үйде тұрған біздің отбасы үш баласы бар жанұяны қабылдап алды. Көз алдымда әрқашан олардың бөлменің бір бұрышына жиналғанын елестете беремін, олар қорқып тұрды – киімдері жыртылған, аш, тозып кеткен. Олар біздің отбасыда өмір сүрді, жұмыс істей бастады, өмір бойы алғыс айтып өтті. Мен оның балаларымен дос болдым. Қазақстан халқы Ассамблеясы құрылған күн – 1 наурызды жыл сайын барлық этностардың бір-біріне және мейірбандық танытып, ол адамдарды өз туғанындай қабылдаған қазақтарға алғыс айту күні ретінде атап өту әділетті болар еді. Ол күн бізді бұрынғыдан да гөрі жақындастыра түспек. Бұл күн мейірімділіктің, бүкіл қазақстандықтардың бір-біріне деген достығы мен махаббатының жарқын мерекесі бола алар еді», – деген болатын.
Жалпы, алғыс айтуға негізделген мереке тек бізде ғана емес, алпауыт мемлекеттерде де аталып өтіледі. Мәселен, АҚШ-та 1621 жылдан бастау алып, 1789 жылы ұлттық мерекеге ұласқан. Бұл күні ондағы барлық отбасы міндетті түрде дастарқан басына жиналып, туыстарына жақсылық жасауға асығады, жақындарын қуанту үшін түрлі тосын сыйлар ойлап табады. Қаладағы көпшілік орындарда арнайы үстелдер орнатылып, адамдар ақша, азық-түліктерін қайырымдылыққа әкеліп қояды. ХVІІ ғасырдан келе жатқан әр түрлі киімдерді киген тұрғындар шеруге шығып, думанды кештер ұйымдастырады. «Жалғанда ойлап тұрсаң бірлік керек, Бірлікті ойлау үшін тірлік керек» деп Төле би бабамыз айтқандай, Алғыс айту күні – Қазақстан халқын біріктіруге бағытталған «Мәңгілік Ел» жалпыұлттық патриоттық идеясының, қазақстандық бірегейліктің негізгі арқауы, еліміздегі барлық ұлт пен ұлысты бір шаңырақ астына топтастыратын тұғырлы мереке. Байтерегім сен едің, бір бүршігің мен едім,
Қолым қысқа демедім, қолтығымнан демедің.
Қазақ деп соққан жүрегі, қазығыңның бірі едім.
Тайғағында тағдырдың табанды саған тіредім.
Рахмет саған, туған ел,-деп өлеңмен өрнектеген ақын Нарша Қашағанұлының жауһар жыры дәл осы мерекенің, Ұлы дала, Отан-ананың әр перзентінің жүрек алғысына ерекше үн қосып тұрғандай. Өйткені бірлік пен ынтымақтың қадірі өмірдің өзіндей құнды, бақыттың өзіндей бағалы. Себебі, біз, Қазыбек бише айтқанда,
Төрімізден құт-береке қашпасын деп,
Жеріміздің шетін жау баспасын деп,
Туырлыққа — ту іліп,
Қыннан қылыш суырып,
Көк найзаның ұшына күдері үкі таққан елміз!
Осы орайда біз де газетімізді ақылшы дос, рухани сырлас санайтын барша оқырман қауымына мың алғыс айтқымыз келеді. Бірлігімізді нығайтып, берекемізді байытқан мейірім мерекесі құтты болсын!
Н.Қадірәлі
