Мәжіліс депутаты Ринат Зайытовпен сұхбатта қоғамдағы ең өзекті мәселелер сөз болды. Депутат көп нәрсеге көңілі толмайтынын ашық айтты, деп хабарлайды BAQ.KZ тілшісі.
Ірі компанияларға қарсы тұра алмайтын елміз
Зайытов ірі инвесторлар мен компаниялардың жергілікті жерлерде заңсыз үстемдік жүргізуін сынға алды.
Тіпті кезінде әуе рейсі «Қазақмыс» басшылығының кесірінен 4-5 сағат кешігетін. Олар аумаққа әмірін жүргізіп алған. Ешкім тексермеген соң, қауіпсіздік талаптары сақталмай қала берді. Сол себепті жазатайым жағдайлар қайталанып жатыр. Басқаша бұл тоқтамайды, — деді ол.
Ауылдан ешкім жайдан-жай кетпейді
Ауыл жағдайына алаңдаушылық білдірген депутат бұл мәселе Парламентте фракция деңгейінде талқыланып жатқанын айтты. Оның пікірінше, ауылды сақтау үшін ең алдымен сапалы медициналық қызмет, білім және тұрақты жұмыс орындары қажет.
Ауыл жері өзіне қайтарылуы керек. Қазір кейбір жерлер жекенің меншігінде болып, адамдарға тіпті шығатын есік қалдырмаған. Әкімдердің де мүмкіндігін арттыру қажет, өйткені оларда тіпті қар күрейтін трактор да жоқ. Жалпы, жайлы жерден ешкім көшпейді ғой, — дейді депутат.
Блогерлерге салық: Кімге тиеді?
Блогерлерге салық бойынша хабарламалар келе бастағанына қатысты Зайытов салықтан жалтарғандардың, әсіресе, құмар ойын мен гивтерді жарнамалағандардың зардап шегетінін айтады. Бірақ әрбір блогерді мазалауға болмайтынын да ескертті.
Өйткені жұмысына адал, әрең күн көріп жүрген блогерлер де бар. Саланы табысы бар және жоқ деп бөліп алуымыз керек. Әйтпесе, қоғамды ойлап, ашықтықты талап етіп жүрген блогерлерге кесірін тигізеді, — деді ол.
«TikTok бізге керек пе?»
Жанарбек Әшімжанның TikTok-қа шектеу қою туралы бастамасына қатысты Зайытовтың жауабы нақты болды.
Әке-шешесіне боқтауды трендке айналдырған платформа бізге қаншалықты қажет? TikTok арсыз қоғамды тәрбиелеп келе жатыр. Қандай жолмен болса да, ақша тапсам болды деген түсінік қалыптасты. Көп арзан коучтардың кесірінен отбасылар ойран болып жатыр, — деді депутат.
Түрмеде туған күн тойлау – түзету мекемелеріндегі бассыздықтың көрінісі
Жақында Шерзат Полаттың өліміне қатысы бар күдіктілердің түрмеде туған күн тойлаған видеосы тарады. Бұл туралы Зайытов өз көзқарасын білдірді.
Бұл – түзету мекемелеріндегі бассыздықтың айқын көрінісі. Кейбір түрмелерде қамаудағыларға барлық жағдай жасалған. Бір шенеуніктің ет асып жеп отырғанын да көрдік. Біз 429-баптағы артықшылықтарды алып тастадық, бірақ түзету мекемелерін қайта тазалау қажет, — деді ол.
https://baq.kz/ake-sheshesine-boqtaudy-trendke-aynaldyrgan-platforma-bizge-kerek-pe-rinat-zayytov-200007990/?fbclid=IwY2xjawIiqBBleHRuA2FlbQIxMQABHYEHpYp8D8xhU8ZOPcuysJazs0R76vJUHlHpOKVEdollej4yElqHgoj4ZQ_aem_BfVVw1ap4PSRltI0QoQPZw
фото Арман Мухатов аривінен
