Ел мен жердің амандығы мен бейбіт күндерінің баянды болуын тілейтін қарттарымыздың ақжолтай лебізі бауырымыздың бүтіндігіне арқау болуда.![]()
Бүгін Ұлы Жеңістің 80 жылдығына орай, «AMANAT» партиясы аудандық филиалының төрағасы Мұратбек Есмұрзаев Жаңатас қаласының тұрғыны, Тыл ардагері Қаппарбек Мұстафаевтың үйіне барып, құттықтап шықты. Қадірлі қарияға «ҰОС — на 80 жыл» мерекелік төсбелгісін тағып, сый-сияпат жасады.
Мереке қарсаңында 90 ға аяқ басқан ауданымыздың қадірлі қариясы Қаппарбек Мұстафаев мерейлі сәтте ақ батасын беріп, жүрекжарды тілегін арнауда. 1936 жылы Жайылма ауылында дүниеге келген абыз ата 1966 жылы кеншілер шаһарына көшіп келіп, талай жылдар еңбектің майданында шынығып, қызметтерді абыроймен атқарды. 1988 жылы зейнетке шыққан қадірлі қария 3 ұл, 2 қызды тәрбиелеп, қанаттыға қақтырмай, тұмсықтыға шоқтырмай өсірді. Еткен еңбектері еленіп, «Еңбек ардагер», «Тыл ардагері» төсбелгілерімен және Тәуелсіздік шақта «Сарысу ауданына 95 жыл» сынды түрлі мерекелік медальдармен марапатталды. 2023 жылы облыстық ардагерлер кеңесінің «Алғыс хатын» алған.Көнекөз қария Тыл кезеңіндегі еңбегі туралы естеліктермен былай деп бөлісті: — Қазір заманның кең кезі ғой. Ол кездері жуанның жіңішкеріп, жіңішкенің үзілер шағы еді. Тылда еткен еңбегім елге еткен еңбегім деп білемін. Тоқсанға таянған шағымда тілерім тек елімнің амандығы, жерімнің тыныштығы. Бақытты елдің ұландары алаңсыз ғұмыр кешсе екен деймін, — деп аталық ақ тілегін жолдады.