Мемлекет басшысы қоғам мен билік арасындағы өзара сенім мен ашық диалогтың маңыздылығына тоқталып, мемлекет пен қоғам тұтастығын нығайту Қазақстан үшін алдыңғы қатардағы міндеттердің бірі екенін айтты, деп хабарлайды baq-orda.kz.
Президент алқалы жиынның ашылуымен құттықтап, форумға арнайы келген қонақтарға алғыс білдірді. Оның айтуынша, жиын барысында көтерілген өзекті мәселелер мен айтылған ұсыныстар Үкіметтің назарында болады.
— Мемлекет пен қоғам тұтастығын нығайту – Қазақстан үшін алдыңғы қатардағы міндеттің бірі. Еліміз тұрақты дамуы үшін халық пен билік арасында өзара сенім және келісім болуы керек. Бұл – мызғымас қағида, – деді Президент.
Мемлекет басшысы қоғамдық келісім өздігінен қалыптаспайтынын атап өтіп, оның жүйелі әрі табанды жұмыстың нәтижесі екенін жеткізді. Осыған байланысты Президент ретінде бұл мәселеге ерекше мән беретінін айтты.
Сондай-ақ Мемлекет басшысы елімізде жүзеге асырылып жатқан «Халық үніне құлақ асатын мемлекет» тұжырымдамасының маңызын ерекше атап өтті. Оның сөзінше, азаматтардың өтініштері мен мәселелеріне дер кезінде жауап беру, халықпен ашық диалог орнату жүргізіліп жатқан реформалардың басты бағыттарының бірі болып қала береді.
Президент бұл жұмысқа мемлекеттік басқарудың барлық деңгейіндегі өкілдер белсенді қатысуы қажет екенін айтты.
— Ашық диалог жүргізу, азаматтардың мұң-мұқтажын ескеріп, арыз-шағымына дер кезінде жауап беру елдегі түбегейлі өзгерістердің өзегі саналады. Осы маңызды жұмысқа министрлер, әкімдер, депутаттар белсенді түрде қатысуы керек. Бұл – мемлекеттік қызметшілердің конституциялық міндеті, – деді Мемлекет басшысы.
Президенттің айтуынша, халық пен билік арасындағы сенімді нығайту және қоғамдық келісімді сақтау елдің тұрақты дамуының басты кепілі болып қала береді.
фото: ашық дерек
