Бүгін Жамбыл облысы үшін маңызды инфрақұрылымдық жобалардың бірі жүзеге асып, ескі «Күйік» асуындағы жаңартылған жол ресми түрде пайдалануға берілді.
1970 жылы салынған жол араға ұзақ жылдар салып алғаш рет күрделі жөндеуден өтті. Осы уақытқа дейін жолдың тарлығы мен сапасының төмендігі тұрғындар мен көлік жүргізушілері тарапынан жиі сынға ұшырап келген болатын.
Аталған мәселе өткен жылдың басында «AMANAT» партиясы Жамбыл облыстық филиалы тарапынан көтеріліп, құзырлы мемлекеттік органдарға нақты ұсыныстар жолданды. Нәтижесінде «ҚазАвтоЖол» ҰК» АҚ тапсырысымен ұзындығы 12 шақырымды құрайтын жол учаскесінде ауқымды қайта жаңғырту жұмыстары жүргізілді. Жөндеу жұмыстарын жүзеге асырған «СинеМидасСтрой» ЖШС жол төсемін толық жаңартып, жол жиегі мен қажетті инфрақұрылым нысандарын талапқа сай ретке келтірді. Жобаның жүзеге асуына ҚР Парламенті Мәжілісінің депутаты Мұқаш Ескендіров қолдау білдіріп, мәселенің оң шешім табуына ықпал етті. Жолдың ашылу салтанатына ҚР Парламенті Мәжілісінің депутаттары Мұқаш Ескендіров пен Әбутәліп Мүтәлі, Жамбыл облысының әкімі Ербол Қарашөкеев және «AMANAT» партиясы Жамбыл облыстық филиалының төрағасы Дауыл Бейсенқұлов қатысты. Жаңартылған жол – өңірдегі көлік қатынасының қауіпсіздігін арттырып, тұрғындар мен жолаушылар үшін қолайлы жағдай жасауға бағытталған маңызды жоба.